Një mjeke në Schwyz ka vaksinuar 100 veta me doza me afat të skaduar

Prokuroria Publike e kantonit Schwyz ka hapur procedurë penale kundër mjekes, së cilës i është ndaluar ushtrimi i profesionit dhe i është mbyllur ordinanca

Në ordinancën e një mjekeje në Ibach (Kantoni Schwyz), dyshohet se janë injektuar doza të vaksinës kundër Covid-19 me afat të skaduar, transmeton albinfo.ch. Dhënia e këtyre vaksinave se supozohet se është bërë gjatë një periudhe disa mujore, bën të ditur kantoni.

Vlerësohet se mbi 100 persona kanë marrë këto vaksina. Kantoni gjithashtu shkruan se tani po bëhet qartësimi i efektit mbrojtës të këtij vaksinimi, për të prekurit, raporton srf.ch.

Sipas njohurive aktuale, nuk priten efekte shëndetësore nga injektimi i dozave të skaduara të vaksinës.

Zyra për Shëndetin dhe Çështjet Sociale në Schwyz rekomandon që të gjithë personat e prekur të sillen veçanërisht me kujdes.

Ndërkohë, Prokuroria Publike e kantonit Schwyz tashmë ka hapur procedurë penale kundër mjekes në fjalë. Asaj i është ndaluar përkohësisht ushtrimi i profesionit dhe i është mbyllur ordinanca.

Duke qenë se jo të gjithë të prekurit mund të identifikoheshin dhe njoftoheshin është krijuar një linjë telefonike për pyetje në lidhje me këtë problematikë.

---