Një ditë para ndeshjes Shqipëri-Serbi, arrestohet “Ballisti”  

Personi që ngriti dronin në stadiumin e Partizanit në Beograd, Ismail Morina i njohur si “Ballisti” u arrestua vetë i katërti në Tiranë. Atyre iu gjetën në veturë dy pistoleta

Një ditë para ndeshjes së shumëpritur në futboll ndërmjet Shqipërisë dhe Serbisë, Policia shqiptare ka arrestuar në Tiranë, personin që ngriti dronin në stadiumin e Partizanit në Beograd, Ismail Morinën i njohur si “Ballisti”. Sipas një njoftimi lëshuar nga forcat e rendit, “Ballistit” dhe tre shtetasve të tjerë, në veturën xhip iu gjet dy pistoleta pa leje.

“Në rrugën “Petro Nini Luarasi”, efektivet e rendit gjatë kontrollit të ushtruar në mjetin tip Fuoristrade Range Rover me drejtues mjeti shtetasin Ismail Morina, i cili është arrestuar se bashku me 3 shtetas të tjerë. U konstatua dy armë zjarri, pistoleta, njëra me 6 dhe tjetra me 30 fishekë, të cilën e kishte pa leje përkatëse”, informoi Policia e Tiranës.

Arrestimi vjen vetëm një ditë para ndeshjes Shqipëri-Serbi. Për Ismail Morinën, që njihet nga shqiptarët si Ismail Ballisti, u përfol shumë edhe në mediet shqiptare, madje ishte objekt diskutimi edhe brenda Federatës së Futbollit të Shqipërisë, që t’i lejohet apo jo hyrja në “Elbasan Arena” me 8 tetor.

Dy ditë më parë, vetë Morina sfidoi shtetin dhe Federatën Shqiptare duke u zotuar se do të jetë në Elbasan, për të parë ndeshjen e Kombëtares kundër Serbisë. Madje për të dëshmuar se do të jetë përkrah tifozëve “Kuqezi” në shkallet e “Elbasan Arenës”, “Ballisti” shfaqi edhe biletën, në tribunën ku do të vendoset.

Nga deklarata e policisë mësohet se, njëra armë ishte e fshehur në xhep, ndërsa tjetra e fshehur në automjetin e Ismail Ballistit. Morina akuzohet për armëmbajtje pa leje, ndërsa tre të arrestuarit tjerë, Erion Bahushi, Denis Balla dhe Marin Rexha akuzohen për moskallëzim krimi.