Një delegacion mësuesish nga Gjermania vizitojnë Kosovën

Kjo vizitë po zhvillohet në kuadër të ekskursionit mësimor njohës në Kosovë, Shqipëri e Maqedoni, ekskursion ky që organizohet nga Ministria e Diasporës, MASHT-i, MAS-i i Shqipërisë dhe subjekte e institucione të tjera

Përfaqësues të Ministrisë së Diasporës kanë pritur një delegacion të mësuesve të mësimit plotësues nga Gjermania, përkatësisht të qyteteve Arnsberg, Sundern e Dortmund, të cilit i printe Kemajl Çallaku, mësues, raporton albinfo.ch.

“Pjesë të këtij delegacioni ishin edhe drejtori i Drejtorisë së Arsimit në qytetin e Dortmundit, Peter Rieger, pedagogë, drejtorë të shkollave gjermane, si dhe prindër të nxënësve. Në fokus të takimit ishte bashkëpunimi mes Ministrisë së Diasporës dhe institucioneve të arsimit të Gjermanisë, mbështetja e mësimit plotësues në Gjermani, si dhe ndihma e mësuesve me libra e mjete të tjera mësimore”, thuhet në njoftimin e Ministrisë së Diasporës.

Kjo vizitë po zhvillohet në kuadër të ekskursionit mësimor njohës në Kosovë, Shqipëri e Maqedoni, ekskursion ky që organizohet nga Ministria e Diasporës, MASHT-i, MAS-i i Shqipërisë dhe subjekte e institucione të tjera.

Gjatë këtij muaji do të realizohen ekskursione me nxënës dhe mësues të shkollave shqipe në Austri, Greqi, Gjermani, Kroaci (shqiptarë, arbëneshë dhe kroatë nga Zara) Gjermani dhe Suedi.