Një avion ulet në bregdetin shqiptar, dyshohet për drogë

Policia nuk ka arrit të konfirmojë nëse ishte defekt i aeroplanit, apo qëllimi ishte që të transportoj një sasi drogë nga Shqipëria në Itali. Në afërsi të aeroplanit u gjetën 400 kg drogë

Përveç shfrytëzimit të automjeteve dhe anijeve, dilerët e drogës në Shqipëri duket se kanë gjetur një linjë të re të shfrytëzimit, atë të transportit ajror. Mirëpo, aksioni i fundit duket se iu shkoj “ters” pasi që një avion i vogël tip “Piper” u zbulua nga policia shqiptare në bregdetin e Divjakës.

Policia nuk ka arrit të konfirmojnë nëse ishte defekt i aeroplanit, apo qëllimi ishte që të transportoj një sasi drogë nga Shqipëria në Itali. Por apriori, policia dhe institucionet shqiptare dyshojnë se ky aeroplan ka lidhje me transport droga, pasi që në një rrugë tjetër të Divjakës, u kap edhe një makinë me mbi 400 kilogram hashish.

Mjeti fluturues, sipas burimeve të para, i përkiste një shtetasi italian që kishte mbërritur në Shqipëri dy ditë më parë, në aeroportin e Rinasit, me leje të rregullt nga autoritetet e Aviacionit Civil, leje me numër 193, dhënë më datë 5 maj.

Sipas burimeve jozyrtare, avioni kishte qëndruar në pistën e Rinasit për dy ditë, deri të shtunën në drekë, rreth orës 13:30 kur mori lejen për t’u ngritur në një udhëtim panoramik. Të njëjtat burime i thanë TCH se pas ngritjes në fluturim, pas orës 14, avioni humbi kontaktin me Kullën e Rinasit.

Menjëherë u lajmëruan autoritetet përkatëse dhe policitë në qarqet e Fierit dhe Vlorës u vunë në kërkim të ndonjë vendi uljeje të mundshme të avionit. Aeroplani “Piper” u gjetur me hundë në rërë, ndërkohë në afërsi të vendit ku ra avioni, policia kapi një veturë me 460 kilogramë kanabis sativa.

Policia pasi rrethoi vendngjarjen arrestoi drejtuesin e mjetit, i cili sipas policisë është shtetasi Saimir Bajrami, i cili u përpoq t’i shpëtonte rrethimit, por u arrestuar dhe gjithashtu iu konfiskuan 27 mijë euro. Piloti nuk pranoi të ketë pasur lidhje me drogën por pretendoi vetëm për një avari teknike në avion.

Ngjarja e Divjakës detyroi presidentin e Republikës, Bujar Nishani, të thërriste në një takim pune në zyrën e tij, Prokurorin e Përgjithshëm Adriatik Llalla për të diskutuar në lidhje me rrëzimin e avionit dhe kapjen e një sasie të konsiderueshme droge.

Presidenti Nishani i kërkoi Kryeprokurorit Llalla angazhimin maksimal të Prokurorisë së Krimeve të Rënda për të drejtuar hetimin, që në çastet e para deri në zbulimin e plotë të ngjarjes së paprecedent, siç e cilëson njoftimi i publikuar në faqen zyrtare të Presidencës.

Duke i siguruar mbështetjen e tij të palëkundur institucionale, kreu i shtetit shqiptar theksoi gjatë takimit me drejtuesin e organit të akuzës, Llalla, se hetimi i kësaj ngjarjeje duhet të jetë i gjithanshëm, me profesionalitet të lartë, transparent, si dhe i besueshëm.

Ndryshe, opozita shqiptare disa herë kishte dhënë vërejtje se droga që prodhohet në Shqipëri, po transferohet për në Evropë me aeroplanë të fshehtë që po vijnë nga vendet fqinje. Mirëpo deri më tani kko nuk ishte marrë për bazë, duke i konsideruar këto si dyshime të pa bazuara.

Siç është raportuar në Shqipëri, kryesisht në zonën e Lazaratit afër Gjirokastrës, prodhohen rreth 900 ton kanabis brenda një viti.