Një adoleshent shkakton frikë në avion pasi tha se kishte bombë në xhep

Ilustrim, Pixabay

Një djalë 16-vjeçar shkaktoi kaos në një avion të kompanisë “Spirit Airlines” të hënën pasdite, pasi deklaroi me shaka se mbante një bombë. Incidenti ndodhi në fluturimin nga Fort Lauderdale drejt Kansas City.

Pasi dëgjuan fjalët e tij, stjuardesat dhe disa pasagjerë u alarmuan dhe e raportuan menjëherë si kërcënim serioz. Për siguri, aeroplani u lëviz në një zonë të veçantë të aeroportit, ndërsa forcat e rendit dhe zyrtarët e Qarkut Broward u ngjitën në bord për të arrestuar të miturin. Pas kontrolleve rezultoi se nuk kishte asnjë lloj bombe dhe pasagjerët u zbarkuan përkohësisht. Fluturimi u nis me vonesë për në Missouri.

Djali ndodhej në Florida për pushime me miqtë, por pas arrestimit u dërgua në qendrën e paraburgimit për të mitur dhe doli para gjykatës të martën. Babai i tij, Phillip Schmidt, iu drejtua gjykatës përmes video-lidhjes nga vendi i punës, duke i kërkuar gjyqtares të tregonte mëshirë për të birin.

“Besoj që ai thjesht po sillej si një fëmijë i papjekur, jo si një kriminel,” tha ai. Ndërkohë, avokati mbrojtës pranoi se klienti i tij kishte përdorur shprehjen “kam një bombë në xhep”, por theksoi se autoritetet nuk treguan saktë se ku dhe kur e kishte thënë këtë.

Gjykatësja Stacy Ross bëri të ditur se kompania “Spirit Airlines” ka kërkuar dëmshpërblim prej 50 mijë dollarësh për shkak të incidentit dhe vonesave të shkaktuara. Adoleshenti tani përballet me akuza për lajmërim të rremë për bombë si dhe për dëmtim pronësie mbi vlerën e 1 000 dollarëve.