Nisin homazhet për Zarife Hasanaj, sot ditë zie në Shqipëri

Kanë nisur homazhet për nder të nëntetares Zarife Muharrem Hasanaj, që ra në krye të detyrës gjatë misionit të FA në Letoni, në Pallatin e Kongreseve.

Familjarë, të afërm e miq, por edhe personalitete të larta shtetërore do të nderojnë për herë të fundit nëntetaren që vdiq në krye të detyrës. Përpara trupit të Dëshmores së Atdheut u përkul i pari i ati i saj, e familjarë të tjerë.

Dje, Këshilli i Ministrave, ka vendosur që data 10 maj 2019 të shpallet dite zie kombëtare në nderim të nëntetares Zarife Muharrem Hasanaj, raportojnë mediat shqiptare.

Sipas këtij vendimi, në të gjitha institucionet shtetërore flamujt do të ulen në gjysmështizë dhe në orën 12:00 do të mbahet një minutë heshtje.

Pas ceremonisë trupi do të lëvizë sipas ceremonialit ushtarak përgjatë bulevardit “Dëshmoret e Kombit” për tu dërguar më pas të prehet pranë dëshmorëve të FA, pranë monumentit “Nënë Shqipëri”, përcjell albinfo.ch.