Ngritet alarm për ndryshimet klimatike në botë

Vetëm vitin e kaluar bota përjetoi një numër të paprecedent përmbytjesh, të nxehti të lartë dhe zjarresh në të 4 kontinentet.

Efektet e ndryshimeve të klimës do të bëhen më agresive në dekadat e ardhshme, edhe nëse ndotja nga karboni vihet nën kontroll.
Paralajmërimi është bërë nga një panel i posaçëm i OKB-së, që ka deklaruar se shumë vende të botës janë të cenueshme nga ndryshimet.

Akullnajat po shkrijnë, niveli i deteve po rritet dhe zjarret masive janë përhapur kudo në botë.
2021-shi ishte viti kur ndryshimet e klimës prekën njerëzit nga Aleksandria në Hong Kong, transmeton Euronews, përcjell Albinfo.ch.

Paneli Ndërqeveritar i OKB-së për ndryshimet e klimës ka paralajmëruar se nivelet e deteve mund të rriten nga 28 deri në 98 cm brenda vitit 2100, me pasoja të rënda për qytetet bregedetare dhe shtetet me lartësi të ulët.

“Është e qartë që në botë ka zona të cenueshme, kryesisht ato tropikale dhe ato në zhvillim. Afrika, Azia jugore dhe ishujt e Paqësorit janë shumë të cenueshme kur bëhet fjalë për impaktet e klimës. Por këto efekte tashmë janë të dukshme në gjithë botën”, tha Petteri Taalas, Organizata Botërore Meteorologjike.

Të gjitha këto efekte do të përshpejtohen në dekadat e ardhshme, edhe nëse ndotja nga karboni, që udhëheq ndryshimet e klimës, vihet nën kontroll.

---