Nga 22 bashki, socialistët fituan 16

Rezultatet e zgjedhjeve preliminare nxjerrin Partinë Socialiste fituese të zgjedhjeve lokale. Në Tiranë Erion Veliaj i PS-së prijnë dukshëm kundrejt Halim Kosovës të PD-së

Procesi i numërimit të votave në Shqipëri po ecën me ritëm të ngadaltë, ndërsa nga votat e numëruara shihet se prijnë koalicioni i majtë në shumicën e bashkive. Sipas rezultateve preliminare, në 22 bashki sa ka përfunduar procesi, krahu i majtë i ka fituar 16 prej tyre, ndërsa e djathta demokratike ka fituar vetëm 6 bashki.

Me fitoren në zgjedhjet vendore, të majtët marrin apriori mandat 4-vjeçar në Himarë, Konispol, Belsh, Gramsh, Urë Vajgurore, Libohovë, Mirditë, Skrapar, Konispol, Delvinë, Pustec, Kolonjë, Has, Pukë, Fushë Arrëz e Peqin.

Të djathtët aktualisht konfirmohen fitues në Përmet, Tropojë, Klos, Selenicë, Mat dhe në Vorë.

Sa i përket Tiranës, për 363 kuti të numëruara nga 864, kryeson Erion Veliaj i Partisë Socialiste me 53.81 për qind, kundrejt 38.65 për qind të rivalit demokrat, Halim Kosova.

Nga numërimi i deritanishëm, kandidatët e të majtës kryesojnë dhe në Durrës, Vlorë, Berat, Fier, Elbasan, Gjirokastër e Korçë.

Në zgjedhje u thirrën rreth 3.4 milionë shqiptarë me të drejtë vote dhe morën pjesë rreth 1.5 milionë ose afro 47 për qind. Ata votuan për kryetarët e rinj të 61 bashkive në gjithë vendin dhe këshillat e rinj bashkiakë.