Nga 1 qershori mërgimtarët pajisen me dokumente nëpër konsullata

Duke filluar nga 1 qershori të gjithë mërgimtarët do të kenë mundësi të pajisen me dokumente personale në 13 misionet konsullore të Republikës së Kosovë.

Ministria e Punëve të Jashtme (MPJ) ka bërë të ditur sot se nëpunësit e këtyre përfaqësive diplomatike do të jenë të gatshëm të pranojnë kërkesat e shtetasve të Kosovës, për pajisje me letërnjoftim dhe pasaportë të Kosovës..

Sipas një njoftimi të MPJ-së, tashmë, në misionet konsullore të Kosovës është montuar e gjithë teknika e nevojshme, ka përfunduar infrastruktura ligjore dhe janë dërguar aplikacionet e nevojshme për pajisje me letërnjoftime dhe pasaporta.

Stafi i konsullatave do të punojë me intensitet të shtuar, më qëllim të ofrimit të shërbimeve për sa më shumë qytetarë të Kosovës me banim jashtë vendit. Po ashtu, brenda pak ditëve, nëpër konsullatat e Kosovës do të dërgohen edhe 10 ekspertë të Ministrisë së Punëve të Brendshme (MPB), për të ndihmuar dhe lehtësuar punën e zyrtarëve të misioneve konsullore, për të përballuar fluksin eventual të kërkesave për pajisje me dokumente personale të Kosovës.

Funksionalizimi i plotë i shërbimit për qytetarët e Kosovës me banim jashtë vendit, është në vazhdën e përpjekjeve të MPB-së për të ofruar shërbime konsullore për të gjithë shtetasit tanë dhe për të përfaqësuar, mbrojtur e ndihmuar realizimin e interesave të tyre.

Për shkak të kërkesave të mëdha për pajisje me dokumente personale, MPJ ka kërrkuar mirëkuptim nga mërgimtarët në rast të ballafaqimit me ndonjë vonesë apo problem eventual teknik, gjatë kryerjes së shërbimeve të tyre.

Shtetasit e Kosovës me banim jashtë vendit mund të aplikojnë për dokumente personale në 13 misioneve konsullore.

Në Gjermani mund të aplikojnë në misionin konsullor në Berlin, në Frankfurt dhe në Stuttgart.

Në Zvicrës mund të aplikojnë në misionin konsullor në Bernë, në Cyrih dhe në misionin konsullor në Gjenevë.

Ndërsa në Italisë në misionin konsullor të Kosovës në Romë. Në Francës mërgimtarët mund të aplikojnë në misionin konsullor në Paris, ndërsa në Suedi në misionin konsullor në Stokholm.

Në Belgjikës në misionin konsullor në Bruksel. Në SHBA në misionin konsullor në New York, ndërsa në Austrisë në ndërtesën e misioni konsullor të Kosovës në Vjenë, si dhe në Mbretërinë e Bashkuar në misioni konsullor në Londër.