Nesër përfundon numërimi i votave me postë

Foto FB: Komisioni Qendror i Zgjedhjeve

Në Qendrën e Numërimit dhe Rezultateve po vazhdon procesi i numërimit të votave me postë.

Zëdhënësi i Komisionit Qendror të Zgjedhjeve, Valmir Elezi sot në një konferencë ka njoftuar se nesër pritet të përfundojnë numërimi i të gjitha fletëvotimeve që i takojnë votimit me postë.

“Deri ditën e martë do të arrijmë të përmbyllim numërimin e gjitha fletëvotimeve që i takojnë votimit me postë dhe pas kësaj do të fillojmë numërimin e fletëvotimeve që i takojnë votimit me kusht i cili është zhvilluar në 56 vendvotime me datën 9 shkurt si dhe pastaj numërimin e votave të personave me nevoja të veçanta. Pasi të mbyllen gjitha këto procese si dhe pasi të marrim konfirmimin nga ana e PZAP-së dhe Gjykatës Supreme se nuk ka ndonjë çështje që është duke u shqyrtuar në këto institucione atë herë KQZ do të mund të shpall rezultatin përfundimtar për subjektet politike dhe kandidatët e këtyre zgjedhjeve”, ka thënë ai, transmeton albinfo.ch.

Elezi shtoi se çdo numërim që bëhet në QNR është i ankimueshëm dhe kjo do të thotë që vëzhguesit, subjektet politike mund të paraqesin ankesat e tyre për çdo administrim dhe për çdo numërim që zhvillohet në QNR.

“Të gjitha statistikat e një procesi zgjedhor sa i përket votave të pavlefshme, ne do t’i kemi me kohën kur KQZ do t’i shpallë rezultatet përfundimtare. Pjesë e statistikave që ka një proces zgjedhor natyrisht që do të jenë edhe fletëvotimet e pavlefshme. Në rastet kur ka paqartësi nëse një fletëvotim duhet të llogaritet i vlefshëm apo ndryshe, është PZAP ku palët mund të paraqesin ankesat e tyre”, tha ai