Nëna me dy fëmijët hidhet në vdekje, në humnerën Creux-du-Van

Prokuroria publike ka nisur hetimet. Sipas gjetjeve fillestare, autoritetet supozojnë se gruaja është hedhur vetë në thellësi me djemtë e saj

Një grua 37-vjeçare ka rënë në humnerën Creux-du-Van (Neuchâtel) të dielën në mëngjes së bashku me dy djemtë e saj, dy dhe katër vjeç, transmeton albinfo.ch. Një alpinist ka lajmëruar policinë rreth orës 9:40, e cila ka publikuar njoftimin sot.

Katër patrulla kanë shkuar në vendin e ngjarjes, ndërsa edhe një helikopter Rega ka fluturuar atje, shkruan sda.ch. Siç ka thënë policia kantonale, ekipet shpëtimtare kanë gjetur me shpejtësi kufomat e gruas dhe dy djemve.

Prokuroria publike ka nisur hetimet. Sipas gjetjeve fillestare, autoritetet supozojnë se gruaja është hedhur vetë në thellësi me djemtë e saj.

Creux-de-Van është një “kazan” i thellë në Jura në Val de Travers, i rrethuar nga shkëmbinjtë vertikalë. Gryka në formë arene është rreth 1200 metra e gjerë dhe 500 metra e thellë, transmeton albinfo.ch. Gjatësia totale e mureve shkëmbore, të cilat bien vertikalisht rreth 160 metra, është katër kilometra.

---