Në Shqipëri arrestohen 5 doganierë

Policia e Shqipërisë njofton se në Pikën e Kalimit Kufitar të Qafë-Thanës janë arrestuar 9 persona prej tyre 5 punonjës të doganës duke e shkatërruar kështu edhe një linjë të kontrabandimit të mallrave të ndaluara  kryesisht goma të përdorura.

Ata akuzohen për veprën penale “Shpërdorim detyre” ndërkohë janë sekuestruar 2100 goma të përdoruara, të dyshuara si kontrabandë, përcjell albinfo.ch.

“Arrestimi u krye pasi, në bashkëpunim me njëri-tjetrin, dyshohet se kanë bërë të mundur futjen kontrabandë të një kamioni me rreth 2100 goma të përdoruara, nëpërmjet Pikës së Kalimit Kufitar Qafë-Thanë, të ngarkuara në mjetin tip kamion me drejtues shtetasin Stojmir Treneski, i cili u ndalua nga shërbimet e policisë në aksin rrugor Pogradec-Maliq, pranë fshatit Sovjan, teksa po tentonte të shkarkonte mallin e kontrabanduar, në magazinën e Petraq Dimkos”, thuhet në njoftimin e policisë.

Po ashtu theksohet se po vazhdojnë hetimet për të dokumentuar veprimtarinë e personave të tjerë që mund të jenë implikuar në këtë rast.