Në shkurt, Kosova shkon në kolaps buxhetor

Nëse vazhdon kriza politike edhe për disa muaj, atëherë punëtorët që paguhen nga shteti nuk do të kenë paga për muajin shkurt. Sipas ekspertëve, në shkurt Kosova shkon në kolaps

Nëse kriza politike në Kosovë vazhdon deri në fillim të vitit të ardhshëm, atëherë punëtorët që paguhen nga buxheti i shtetit, administrata, policia, mësuesit, mjekët…, mund t’i marrin pagat vetëm edhe për muajin janarit të vitit të ardhshëm. Pas kësaj kohe shteti shkon në kolaps, vlerësojnë analistët.

Ndërsa në Ministrinë e Financave thotë se sipas ligjit, do të ketë paga deri në muajin mars të vitit të ardhshëm. Ndërsa me këto konstatim nuk pajtohet ish-ministri i Financave, Haki Shatri, i cili për media kishte deklaruar se ligjërisht nuk duhet të ketë rroga as për muajin janar.

Eksperti i çështjeve ekonomike, Lumir Abdigjiku duke interpretuar nenin 24 të Ligjit për menaxhimin e Financave Publike, thotë se pagat e janarit të vitit të ardhshëm duhet të paguhen, por jo edhe të muajit shkurt.

Kurse, eksperti juridik Riza Smaka, pajtohet me interpretimin e këtij të fundit.

“Pagat e janarit do t’i kenë, sipas ligjit u takojnë, s’ka pengesë, mund t’i marrin pagat e janarit të 2015”, deklaroi ai, raporton TG. 

Smaka këtë e ndërlidhë me zgjedhjet e përgjithshme për Deputetët e Kuvendit, që deri në fund të vitit fiskal do të bëhet që të jenë mbajtur për më shumë se katër muaj. “…pagat e janarit po do të merren, të tjerat, për muajin shkurt e tutje kurrsesi, derisa të konstituohej Kuvendi”, thekson ai.

Smaka thotë se nëse ekzekutohen edhe pagat e shkurtit qeveria do të bënte shkelje ligjore.

“Në kushtet normale në shtetin e së drejtës, qeveria do të binte, do të hapej procedurë penale, unë nuk besoj se qeveria do ti jep vetit atë komoditet që të shkelë ligjin me katër këmbë”, thekson Smaka, i cili shpreson se deri atëherë do të arrihet një zgjidhje në mënyrë që punëtorët kosovarë të mos mbeten pa paga.

Ndryshe, nga muaji maji i këtij viti, Kosova funksionon pa Kuvend, ndërsa nga 8 qershori kur janë mbajtur zgjedhjet e parakohshme parlamentare, funksionon me një qeveri në detyrë.

Në zgjedhjet e fundit PDK e kryeministrit Hashim Thaçi doli e para me 30 për qind. Por, katër partitë që mbetën pas LDK, AAK, Nisma për Kosovën dhe Vetëvendosje, janë bashkuar kundër PDK-së.

Kjo gjendje ka nxjerr një situatë të re politike, pasi që Gjykata Kushtetuese ia njeh autonominë për formimin e institucioneve vetëm partisë fituese-PDK-së, mirëpo kjo e fundit nuk po gjen partnerë për koalicion e rrjedhimisht edhe nuk po lëshon rrugë që qeverinë ta bënë koalicioni i pakicës.

Kjo gjendje po e mbanë Kosovën të bllokuar tash e pesë muaj, e madje nuk ka as shenja se pa ndërmjetësimin e shteteve të QUINT-it (katërshja e BE-së dhe SHBA), mund të zgjidhet. Janë këto shtete që kanë ndërmjetësuar edhe në të kaluarën për zgjidhjen e ngërçit politik në vend.