Në Shkup qetë, por me tensione

Në Shkup mbrëmë ka qenë natë e qetë, por me tensione të mëdha dhe forca të shumta policore.

Mediat në maqedoni raportojnë se kryeqyteti ka qenë gjatë tërë natës i blinduar nga forcat speciale policore dhe patrullat e rregullta, që kanë qarkulluar për të ruajtur rendin dhe qetësinë, pas demonstratës së dhunshme të organizuar nga qindra protestues maqedonas nëpër rrugët e Shkupit.

Sipas mediave, policia ka legjitimuar lëvizjen e makinave në akset hyrëse, duke legjitimuar dhe kontrolluar makinat e dyshimta.

Gjatë protestës së zhvilluar mbrëmë janë shkaktuar dëme të mëdha materiale, me ç`rast në terren janë parë ekipet e ndërmarrjes për Pastrim të Shkupit, për të pastruar rrugët me gurë, xhama e materiale tjera, nga demolimet që i`u bënë disa makinave dhe dyqaneve.

Forcat policore më të koncentruara kanë qenë pranë Qeverisë dhe objekteve të tjera shtetërore, si dhe në akset që lidhin pjesën qendrore me lagjet shqiptare.

Siç mëson agjencia e lajmeve INA, mbrëmë ka pasur takime dhe komunikime intensive midis diplomatëve evroperëndimor dhe autoriteteve shtetërore të Shkupit, për të vënë nën kontroll situatën e sigurisë. Për dallim nga netët e tjera, mbrëmë nuk janë regjistruar bllokada totale të rrugëve në lagjet Draçevë dhe Radishan.

Ndërkohë janë paralajmëruar takime intensive dhe mbledhje e kreut të ngushtë qeveritar për të vlerësuar gjendjen e krijuar. Shtabi emergjent i MPB-së për ndriçimin e vrasjes në Smilkovc vazhdon të qëndrojë i stacionuar në stacionin policor Gazi Babë në Shkup.