Në Kosovë mbretëron një siguri e qëndrueshme

Në mbledhjen e Këshillit të Sigurisë u shqyrtua edhe platforma vjetore e Agjencisë Kosovare të Inteligjencës (AKI).

　

Këshilli i Sigurisë së Kosovës, i kryesuar nga kryeministri Hashim Thaçi, në mbledhjen e radhës, të mbajtur sot, paraqiti një vlerësim të gjendjes politike dhe të sigurisë në vend. Kryeministri Thaçi ka vlerësuar se gjendja e sigurisë edhe përkundër sfidave ekonomike e sociale vazhdon të mbetet e qetë, stabile dhe e qëndrueshme.

　

Po ashtu, sipas Thaçit, marrëdhëniet ndëretnike kanë shënuar një ngritje në nivel vendi dhe se numri i incidenteve ndëretnike ka shënuar rënie të vazhdueshme.

　

Në mbledhje është përkrahur gatishmëria dhe profesionalizmi i Policisë së Kosovës e cila me përkushtimin e treguar ka bërë që të zbulohen, trajtohen dhe eliminohen aktivitete të ndryshme kriminale si dhe uljes së përqindjes së kryerjes së veprave penale dhe atyre kundërvajtëse.

　

“Vazhdimi i kalimit të kompetencave nga ndërkombëtarët te vendorët si dhe vazhdimi i zvogëlimit të trupave të KFOR it, janë dëshmia më e fuqishme se siguria në Republikën e Kosovës është stabile dhe e qëndrueshme dhe se sektori i sigurisë po vazhdon suksesshëm konsolidimin e tij”, citohet të ketë thënë Thaçi në këtë mbledhje.

　

Këshilli i Sigurisë së Kosovës vlerësoi si shumë të rëndësishëm procesin e regjistrimit të popullsisë dhe ekonomisë familjare, e cila do të ofrojë një pasqyrë gjithëpërfshirëse të kushteve sociale dhe jetësore të qytetarëve të Kosovës.

　

Në këtë mbledhje u vlerësua lart formimi i dy komisioneve parlamentare për ndryshimet kushtetuese. Me këtë vlerësohet se Kosova ka hyrë në një proces të thellë reformues, i cili nuk kufizohet vetëm në zgjedhjen e presidentit dhe zgjedhjeve të përgjithshme por edhe në ndryshime të tjera sipas vlerësimit të institucioneve përkatëse.

　

Po ashtu në këtë mbledhje u shqyrtua edhe u miratua plani vjetor i punës së Këshillit të Sigurisë për vitin 2011, si dhe shqyrtua platforma vjetore e Agjencisë Kosovare të Inteligjencës (AKI).

　

　

---