Në Kosovë, mbi 12 milionë euro import nga Serbia

Prej momentit kur Qeveria ka larguar taksën 100% ndaj prodhimeve të Serbisë dhe vendosjen e mases së reciprocitetit, në Kosovë nga Serbia prej datës 1 prill e deri më 26 prill të këtij viti, “janë importuar mallra në vlerë prej 12.4 milionë euro, ndërkaq importet e lëndës së parë kapin vlerën prej 3.5 milionë euro”, njoftoi përmes një komunikate për medie Ministria e Financave dhe Transfereve në raportin e saj përmbledhës për zbatimin e masave të reciprocitetit.

Siç thuhet në njoftimin e Ministrisë së Financave dhe Transfereve, “në të gjitha rastet ku është vërejtur ndonjë emërtim apo denominim provokues, mallrat janë kthyer mbrapa në Serbi dhe nuk janë lejuar të importohen dhe të zhdoganohen në Kosovë. Gjatë kësaj periudhe është evidentuar një rast i tillë dhe mauna së bashku me mallrat është kthyer në Serbi”.

Nga importi i këtyre mallrave, sipas Doganës së Kosovës, janë mbledhur taksa në vlerë prej mbi 1 milion euro.
Ndërkaq, nga Kosova në Serbi, janë eksportuar mallra në vlerë prej 0.7 milion euro.
Ministria e Financave dhe Transfereve në komunikatën e saj ka potencuar edhe sfidat gjatë zbatimit të masave të reciprocitetit, përcjell Albinfo.ch.