Në disa kantone të Zvicrës, masa të reja kufizuese

Për shkak të mos vaksinimit, disa pjesë të Zvicrës mund të vendosin masa të reja

Për të korrigjuar mbulimin e ulët të vaksinimit në disa kantone, ku infeksionet Covid-19 janë në rritje, disa pjesë të Zvicrës mund të vendosin masa më kufizuese, transmeton albinfo.ch.

“Për të monitoruar zhvillimin e virusit, do të jetë e nevojshme të merret parasysh shumë më tepër shkalla e vaksinimit në rajone të ndryshme sesa norma e përgjithshme zvicerane”, sipas Zyrës Federale të Shëndetit Publik (BAG).

Dhe Lukas Engelberger, president i Konferencës së Drejtorëve të Shëndetësisë, vuri në dukje se “rreziku i një ngarkese të madhe ose mbingarkesës së sistemit shëndetësor është përsëri shumë real në disa rajone”.

Për momentin, kantonet që mund të synohen nga direktiva e re janë të gjitha në pjesën lindore të vendit, ku përqindja e të rriturve plotësisht të vaksinuar është shumë nën mesataren kombëtare prej 63.4 për qind.

Ato përfshijnë dy Appenzells, Glarus, Graubünden, Nidwalden, Obwalden dhe Schwyz. /Albinfo.ch

---