Nderim për Shën Nënë Terezën në Lozanë

Përfaqësuesit diplomatikë shqiptarë përkujtojnë Nënë Terezën në Zvicër

Në ditën e shenjtërimit të Shën Nënë Terezës, figura universale e humanizmit dhe bijë e kombit shqiptar, përfaqësues diplomatikë të vendeve të rajonit u bashkuan në një akt nderimi në Lozanë.

Pranë shtatores së saj, u vendosën buqeta me lule nga Valon Gashi, përfaqësues i Ambasadës së Republikës së Shqipërisë në Zvicër, Ambasadori i Republikës së Kosovës, Mentor Latifi, si dhe Ambasadori i Maqedonisë së Veriut, Rexhep Demiri. Ky gjest simbolik shënoi respektin e përbashkët për jetën dhe misionin e shenjtëres shqiptare.

Shën Nënë Tereza mbetet një nga figurat më të ndritura të shekullit XX, e njohur për përulësinë, dashurinë dhe përkushtimin ndaj më të varfërve e të pambrojturve. Në këtë ditë të veçantë, përfaqësuesit diplomatikë theksuan se vepra e saj e përjetshme vazhdon të jetë udhërrëfyes për paqe, humanizëm dhe solidaritet mes popujve. /Albinfo.ch

 

---