Mungesë e vaksinës kundër gripit në Zvicër për shkak të kërkesës së lartë

Vaksina kundër gripit po mungon në shumë pjesë të Zvicrës, përfshirë kantonin e Lucernës, si pasojë e një rritjeje të papritur të kërkesës. Sipas Shoqatës Zvicerane të Farmacistëve, farmacitë kishin porositur sasi më të vogla vaksinash këtë vit, duke u bazuar në normat e ulëta të vaksinimit gjatë viteve të fundit dhe rrezikun financiar nga dozat e papërdorura.

Furnizimi me vaksina realizohet përmes distributorëve kombëtarë dhe jo në nivel kantonal. Kur këta distributorë mbesin pa stok, vaksina nuk është më e disponueshme në të gjithë vendin. Aktualisht nuk ekziston një pasqyrë e qartë se cilat farmaci kanë ende vaksina, ndaj qytetarët duhet të kontaktojnë individualisht farmacitë ose mjekët e familjes.

Ekspertët theksojnë se vaksinimi kundër gripit idealisht duhet të kryhet deri në mesin e nëntorit. Megjithatë, për personat me rrezik të shtuar – si të moshuarit dhe personat me imunitet të dobësuar – vaksinimi mbetet i rekomanduar edhe në këtë fazë të sezonit.