Mitrovicë, vazhdon apeli për bojkot të zgjedhjeve

Drejtori i Zyrës për Mbrojtje dhe Shpëtim në Mitrovicë, Behxhet Bala thotë se grupe radikale serbe janë duke i frikësuar qytetarët që të mos marrin pjesë në zgjedhjet e 17 nëntorit

Qytetarë serbë që banojnë në veriun e Mitrovicës vazhdojnë të qëndrojnë në ambivalencë, ndërmjet thirrjeve për rivotim me 17 nëntor, apo kërcënimit të grupeve radikale për bojkotim të zgjedhjeve. Shqiptarët, në anën tjetër, kërkojnë nga policia që të krijojnë siguri në ditën e rivotimit.

Komisioni Qendror i Zgjedhjeve tashmë ka caktuar 17 nëntorit, ditën kur duhet të rivotohet në tri qendra votimi në Mitrovicën e Veriut, pasi që me 3 nëntor, grupe huliganësh serbë, të maskuar dhe me shtaga bejsbolli, hynë nëpër qendrat e vendvotime  dhe i demoluan ato.

Ky cenim i demokracisë nxiti reagime gjithandej opinionit botëror, ndërsa Beogradi u akuzua për joseriozitet në integrimin e serbëve. Prandaj, i menjëhershëm ka qenë dhe reagimi i kryeministri serb, Ivica Daçiq i cili kërkoi që të votohet masovikisht  me 17 nëntor.  

Pavarësisht kësaj, grupe radikale serbe po vazhdojnë të bëjnë thirrje për bojkot të zgjedhjeve.

Drejtori i Zyrës për Mbrojtje dhe Shpëtim në Komunë e Mitrovicës, Behxhet Bala theksoi se në veriun e qytetit është duke vazhduar antifushata e grupeve ekstremiste kundër mbajtjes së zgjedhjeve.

“Këto grupe janë duke i frikësuar qytetarët në veri që të mos marrin pjesë në zgjedhje”, deklaroi ai.

 Bala kërkoi nga strukturat e sigurisë që të mobilizohen në mënyrë që më 17 nëntor të ketë kushte për zgjedhje të lira edhe në veri, përderisa përfaqësuesit e Policisë së Kosovës në jug, theksuan se janë duke u përgatitur që edhe balotazhi të shkoj pa probleme.

Situata e sigurisë në veri gjatë javës së fundit, sipas tij, ka qenë e qetë, por jo edhe e qëndrueshme.

Behxhet Bala përmendi shpërthimin që ka ndodhur javën e kaluar në selinë e Partisë Demokratike të Kosovës në Lagjen e Boshnjakëve.

 “Si pasojë, janë shkaktuar shumë dëme materiale, por nuk ka pasur të lënduar. Kërkojmë nga organet përgjegjëse që sa më parë të zbardhin rastin”, ka deklaruar ai.