Miratohet projekt-buxheti më i madh në histori

Buxheti për vitin 2015, sipas qeverisë shqiptare, është parashikuar të jetë më i madhi i të gjitha viteve, 4.7 miliard dollarë. Vetëm doganat kanë mbledhur 200 milionë më shumë

Qeveria e Shqipërisë ka miratuar të hënën Projektbuxhetin për vitin 2015 në vlerë 470 miliardë lekë ose 4.7 miliardë dollarë. Buxheti për vitin e ardhshëm, sipas qeverisë shqiptare, është parashikuar të jetë më i madhi i të gjitha viteve, prej që vendi është demokratizuar.

Qeveria në këtë projektbuxhet ka përfshirë prioritetet uljen e borxhit publik nga 71 për qind të prodhimit të brendshëm bruto në 65.5 për qind, ndërsa ka parashikuare dhe investime kapitale dhe rritjen e pagave.  

“Investimet publike do të jenë 5 për qind të prodhimit kombëtar dhe 100 milionë dollarë më shumë se një vit më parë”, thuhet në projektbuxhet, raporton Shekulli. Ndërsa sektorët kyçë për investime, siç u tha në mbledhjen e Qeverisë, do të jenë, arsimi, shëndetësia, energjia dhe bujqësia.

Në paketën fiskale të vitit 2015, Ministria e Financave planifikon të bëjë disa ndryshime, efekti i të cilave në buxhet llogaritet të jetë 10 miliardë lekë. Pas miratimit në qeveri, projekt-buxheti dhe paketa fiskale dhe të shkojnë në parlament dhe përgjatë një muaji, puna e komisioneve parlamentare do të përqendrohet te diskutimi i tyre.

Ndryshe, drejtoria e Përgjithshme e Doganave ka publikuar rezultatet për 13 muajt e fundit. Në raport thuhet se nga shtatori 2013 deri në tetor 2014 janë arkëtuar në total 200 milionë dollarë më shumë.

Ndryshe, projektbuxheti i këtij viti ka qenë 459 miliard lekë ose 4.5 miliardë dollarë.