Miratohet Ligji mbi zbatimin e iniciativës për migracion

Ndërsa në një komunikatë të AUNS, (e afërt me SVP-në) thuhet se marrëveshja për lëvizje të lirë duhet të anulohet dhe se nuk do të lejohet që Zvicra të bëhet koloni e BE-së

Keystone

Dhoma Nacionale e Parlamentit të Zvicrës e ka miratuar sot me shumicë votash ligjin mbi zbatimin e Iniciativës kundër Migrimit Masiv. 89 vota kanë qenë në favor të miratimit, 67 kundër dhe 33 të përmbajtura.

Ligji ka në qendër të tij iniciativën e përmendur të SVP/UDC, e cila në vitin 2014 ishte votuar nga populli me të drejtë vote, njoftojnë mediat zvicerane.  Mirëpo, zbatimi i plotë i kësaj iniciative rrezikonte marrëveshjet bilaterale të Zvicrës me BE-në dhe për këtë arsye Këshilli Federal (Qeveria e vendit) kishte bërë një riformulim, të quajtur “Light” ose të moderuar të tekstit të iniciativës. Ajo që qeveria dëshironte të mos e rrezikonte ishte Marrëveshja për Lirinë e Lëvizjes, transmeton albinfo.ch. Kështu, ligji duhej të bënte fjalë për masat e nevojshme në tregun e punës por pa e rrezikuar lëvizjen e lirë në raport me BE-në.

Kundër ligjit ishin, siç dhe pritej, deputetët e SVP/UDC-së. Madje kreu i grupit parlamentar të kësaj partie, e ka quajtur “akt tradhtie” miratimin e ligjit nga ana e shumicës së deputetëve. Ndërkohë CVP/PDC pothuaj në tërësi nuk kanë votuar as pro as kundër ligjit.

Është e pritshme që deputetët e SVP-së t`i bashkohen iniciativës së AUNS  (Aksioni për një Zvicër Neutrale dhe të Pavarur) për anulimin e Marrëveshjes për Lëvizjen e Lirë me BE-në.

Deputetët e SVP-së të cilët njëherësh janë edhe anëtarë të AUNS sot në parlament kanë paraqitur parullat e iniciativës së re, përcjell albinfo.ch. Po ashtu në një komunikatë të AUNS , thuhet se marrëveshja për lëvizje të lirë duhet të anulohet dhe se ata nuk do të lejojnë që Zvicra të bëhet koloni e BE-së.