Ministrja zvicerane e Drejtësisë favorizon menaxhimin e decentralizuar të azilit

Përballë një fluksi të parashikuar të azilkërkuesve në Zvicër këtë vjeshtë, këshilltarja federale, njëherësh e para e Departamentit Federal të Drejtësisë dhe Policisë, Elisabeth Baume-Schneider, është kundër qeverisë federale që të menaxhojë të gjithë procesin.
“Ne nuk mund të centralizojmë vendimet dhe kostot e grumbulluara”, u shpreh ajo, teksa tha se është e ndjeshme ndaj realitetit të kantoneve.

Megjithatë, ajo theksoi se mund të parashikohen “mjete politike më kreative” në kohë presioni, shkruan swissinfo, përcjell albinfo.ch.

Krijimi i besimit me kantonet

Sekretariati Shtetëror për Migracionin pret 28,000 kërkesa për azil këtë vit. Në varësi të zhvillimeve gjeopolitike, ky numër mund të rritet në 35,000. Midis 20,000 dhe 25,000 njerëz që ikin nga Ukraina pritet gjithashtu të aplikojnë për azil.

Kantonet dhe komunat do të ofrojnë 1,800 vende shtesë pritjeje për azilkërkuesit, njoftoi SEM të premten. 1200 vendet e mbetura aktualisht janë duke u sqaruar. Qeverisë i duhen 3000 vende shtesë.