Ministret, më të besueshme se ministrat

Më së shumti besim gëzon ministrja Doris Leuthard, gjegjësisht 71%. Pas saj vijnë Eveline Widmer-Schlumpf me 65% dhe Simonetta Sommaruga me 63%.

Anëtarët e Qeverisë Federale të Zvicrës, gjegjësisht ministrat e saj vazhdojnë të gëzojnë imazh të mirë te qytetarët zviceranë me të drejtë vote.

Sipas një sondazhi të sponsorizuar nga SRG dhe të realizuar nga instituti gfs.bern, „më së miri punët me popullin“ i ka ministrja aktuale e transportit, e cila vjen nga partia CVP/PDC, Doris Leuthard. Për të kanë votuar 71 për qind të të anketuarve, duke e cilësuar si ministre të denjë për t`ia falur besimin.

Por, edhe dy vendet në vijim janë zënë nga gratë, ministret tjera në Qeverinë e Zvicrës. Në vendin e dytë është ministrja Eveline Widmer-Schlumpf nga partia BDP, e cila gëzon besimin e 65% të personave që morën pjesë në sondazh, ndërsa në të tretin, Simonetta Sommaruga nga SP/PS, me 63%.

Meshkujt, sipas këtij sondazhi kanë mbetur në pjesën e poshtme të listës. Më lartë nga ta janë ngjitur Ueli Maurer (SVP/UDC) dhe Didier Burkhalter (FDP/PLR) për të cilët janë përcaktuar 62% të të anketuarve. Ministri Alain Berset me 59% të besimit të falur nga votuesit potencialë vjen në vendin e parafundit, ndërsa vendin e fundit, sikur edhe në disa sondazhe të mëparshme e zë Johann Schneider-Amman nga FDP/PLR me vetëm 52%.

Sondazhi është bërë në gjysmën e periudhës së legjislaturës aktuale.