Ftohen afaristët në diasporë të investojnë në Kosovë

Në vazhden e takimeve të minstrave të Qeverisë së Kosovës për të shpalosur programin e tyre dhe për t’ i ftuar bizneset shqiptarë për të investuar në Kosovë, në Düseldorf , u mbajt një konferencë më afaristet shqiptarë që jetojnë në Gjermani.

Gjatë kësaj konference e  cila është e treta më radhë pas Vjenës dhe Winterthurit, organizuar nga “KOSME”, ministrja e MTI-së Hykmete Bajrami, ministri i Diaspores  Valon Murati, përfaqësues nga Oda Ekonomike e Kosovës, Safet Gërxhaliu,  nga ECIKS Kujtim Dobruna, si dhe kryetar nderi i Unionit të Bizneseve në Diasporë, Lazim Destani, para mbi 100 ndërmarrëseve shpalosen të gjitha mekanizmat që Qeveria e Kosovës po bën për të tërhequr dhe lehtësuar të gjitha investimet të cilat vijnë nga diaspora në Kosovë.

Ministri i Diasporës, Valon Murati edhe një herë përseriti  nevojën e domosdoshme të investimeve të diasporës në Kosovë për përfitime të dyanshme.

“Ministria e Diasporës si shtyllë kryesore të punës së vet ka bashkëpunimin me afaristët nga diaspora. Vetë krijimi i rrjetit të bizneseve ka për qëllim që me anë të këtij interaksioni të njihen bizneset mes veti, të bëjnë biznes së bashku, të gjejnë rrugën e vet për investime të kanalizuara në Kosovë por edhe tërheqja e investimeve të tjera të huaja në Kosovë”, tha Ministri Murati.

Ministri Murati po ashtu ka theksuar se ministia e Diasporës ka si projekt edhe ruajtjen e identitetit kulturor dhe kombëtar në Diasporë. Ai po ashtu ka përmendur programin e përbashkët për mësim plotësues të gjuhës shqipe  marrëveshje që pritet të nënshkruhet të hënën në mes Republikës së Kosovës dhe Republikës së Shqipërisë.

Përveç ministrit Murati, edhe panelistët tjerë e prezantuan punën e tyre para afaristëve të  Diaspores duke i garantuar gjitha investimet e tyre në Kosovë.