Meta fton investitorët gjermanë të vijnë në Shqipëri

Presidenti shqiptar falënderoi Kryeministrin e Landit Rhein-Westfalien Armin Laschet për mikpritjen dhe mbështetjen që i është ofruar diasporës shqiptare në këtë Land të rëndësishëm në integrimin e tyre në shoqërinë gjermane dhe kthimin e tyre në ura bashkëpunimi

Presidenti i Shqipërisë Ilir Meta ka takuar Kryeministrin e Landit Rhein-Westfalien në Gjermani, Armin Laschet me të cilin kanë diskutuar për bashkëpunimi strategjik mes dy vendeve, transmeton albinfo.ch.

“Ne dëshirojmë më shumë investime e projekte dypalëshe e rajonale me Landin Tuaj, në fushën e ekonomisë, energjisë, infrastrukturës, turizmit, mjedisit e bujqësisë, të cilat do të afronin më shumë Shqipërinë më këtë Land të rëndësishëm të Gjermanisë, si dhe përvojë në shërbime sociale, edukim profesional dhe punësim”, u shpreh Meta.

Në njoftimin për media theksohet se Meta falënderoi Kryeministrin Armin Laschet për mikpritjen dhe mbështetjen që i është ofruar diasporës shqiptare në këtë Land të rëndësishëm në integrimin e tyre në shoqërinë gjermane dhe kthimin e tyre në ura bashkëpunimi dhe faktorë të rëndësishëm të marrëdhënieve dypalëshe. Ndërsa Kryeministri Laschet vlerësoi arritjet e deritanishme të Shqipërisë.