Merkel: Integrimi i Shqipërisë në BE, i padiskutueshëm

Kancelaria gjermane, Angela Merkel tha se çështja nuk shtrohet nëse Shqipëria do të jetë pjesë e Bashkimit Evropian, por pyetja është se kur do të integrohet...

Kancelaria gjermane Angela Merkel i ka dhënë mbështetje të fuqishme integrimit të Shqipërisë në Bashkimin Evropian, ndërsa ka kërkuar nga Tirana zyrtare që t’i përmbushë detyrat e kërkuara. Ajo tha se “çështja nuk shtrohet nëse Shqipëria do të jetë pjesë e Bashkimit Evropian, por pyetja do të jetë vetëm se kur”.

 

Këto deklarata kancelarja gjermane i ka bërë pas një takimi që zhvilloi në Berlin me kryeministrin shqiptar, Edi Rama. Ky i fundit po qëndron në Gjermani me ftesë të kancelares Merkel, e cila i bëri një pritje madhështore kryeministrit Rama.

 

Gjermania e sheh Shqipërinë në rrugën e duhur drejt Evropës, ndërsa perspektiva Evropian e Shqipërisë është e rëndësishme, tha ajo.

 

Pas takimit, Rama dhe Merkel kanë dalë në një konferencë për shtyp, ku theksi kryesor ishte statusi i vendit kandidat të Shqipërisë.

 

“Ne trajtojmë vendet në bazë të raportit të Komisionit Evropian. Në qershor do të marrim një raport të ri. Komisioni do t`i ketë regjistruar përparimet në Shqipëri dhe ne do t`i shikojmë me vështrim pozitiv dhe do të vendosim me vështrim pozitiv. Çështja nuk shtrohet a do ta marrë statusin, çështja shtrohet se kur do ta marrë një raport të ri”, deklaroi Merkel.

 

Ndërkaq kryeministri Edi Rama tha se Shqipëria është në Evropë dhe do të bëjë gjithçka që është e mundur që të integrohet në BE, raporton TCH.

 

“E sigurova kancelaren se Qeveria jonë është plotësisht e vendosur për të ecur në rrugën e modernizimit të reformave që do të garantojnë një luftë reale kundër korrupsionit dhe krimit të organizuar. Shqipëria kërkon të ecë më shpejt drejt Evropës, por duke konsideruar gjithmonë Evropën destinacionin brenda nesh”, u shpreh Rama.

 

Ndërkaq Merkel tha se perspektiva evropiane është e nevojshme për vendet e Ballkanit Perëndimor por edhe për Shqipërinë.

 

“Kryeministrin e informoj se cilat janë projektet e mëdha të vendit dhe na njohu me entuziazmin që po ndiqen këto projekte. Lufta kundër krimit dhe korrupsioni, pavarësia e gjyqësor, shteti ligjor, janë standarde shumë të rëndësishme për t’u arritur. Komisioni Evropian po i ndjek këto procese dhe do të paraqesë një raport, ndërkohë ne i ndjekim me vëmendje zhvillimet”, tha Merkel.

---