Mërgimtari Smajli përfundon odisejadën

Ecja e Smajlit përfundon në ditën kur populli i Kosovës e feston 13 vjetorin e çlirimit

Arritja te Varrezat e Dëshmorëve në Koshare shënon fundin e odisejades së Maxhun Smajlit, reporterit kosovar, i cili për 80 ditë kaloi mbi 2000 kilometra rrugë në këmbë nga Gjermania në Kosovë, në shenjë simbolike dhe falënderimi për NATO-n e cila bombardoi forcat e Millosheviqit 13-vjet më parë.

 Smajli, autor i librit “Lufta dhe dilemat shqiptare”, marshimin e ka nisur nga qyteti Fulda i Gjermanisë duke u bërë simbol i mërgimtarit dhe duke shënuar ecjen më të gjatë në këmbë të një shqiptari.

 Ecja përfundon pikërisht në ditën kur populli i Kosovës e feston 13 vjetorin e çlirimit dhe ditën e kur filloi kthimi i madh masiv i shqiptarëve të dëbuar, nëpër shtëpitë e tyre.

 Sikur sot, 13 vjet më parë forcat britanike ishin të parat që hynë në Kosovë në kuadër të koponentes KFOR, duke i dhënë fund, regjimit të dhunshëm të Serbisë që atëbotë drejtohet nga Sllobodan Millosheviq, njeriu që më vonë u gjykua nga Trubunali Penal i Hagës për krime lufte.

Maxhun Smajli (48), 13 vjet më parë ka qenë reporter që ka pasqyruar çdo detaj të luftës në Kosovë. Ai ka qëndruar në pjesën e shqiptarëve dhe ka pasqyruar në mënyrë reale luftën e UÇK-së në zona të ndryshme, si në Drenicë, Dukagjin etj. “Këtë dëshirë e kam pasur në shenjë nderimi dhe respekti për të gjitha ato shtete që ka luftuar për çlirimin e Kosovës dhe faktikisht pata menduar që marshin ta realizoj më 24 mars dhe të zgjatë 78 ditë, po aq edhe sa ka zgjatur bombardimet e NATO-s mbi caqet serbe”, ka thënë në nisje Maxhun Smajli. Ai fillimisht kishte pas idenë që nisjen e tij ta fillojë dy vjet më parë, në 10-vjetorin e hyrjes së NATO-s në Kosovë, por për shkak të dokumente e kishte shtyrë për dy vjet, duke e lidhur këtë ecje edhe me 100 vjetorin e Shpalljes së Pavarësisë së Shqipërisë.

 Ndryshe, marshimi i Smajlit ka qenë krejt i veçantë dhe që ka tërhequr vëmendjen e të gjithëve medieve dhe qytetarëve.