Mediat britanike e lidhin vrasjen e kandidatit për president në Ekuador me shqiptarët

Fernando Villavicencio, FB

Ekuadori vitet e fundit është kthyer në një qendër për trafikantët ndërkombëtarë të drogës, të cilët kanë bashkuar forcat me bandat lokale të rrugëve dhe kanë nisur një valë dhune si kurrë më parë në histori.

Vrasja e kandidatit presidencial, Fernando Villavicencio, e vulos zbritjen e Ekuadorit në kaos kriminal. Banda që pretendohet se është prapa vrasjes ka lidhje të ngushta me fraksionet shqiptare që transportojnë kokainë në Mbretërinë e Bashkuar, ashtu si edhe me kartelet meksikane të drogës.

“Los Lobos”, ose “Ujqërit”, mendohet se përfshijnë deri në 8,000 anëtarë, shumica prej të cilëve e drejtojnë botën e tyre kriminale nga burgjet e Ekuadorit, shkroi The Telegraph.

Villavicencion ishte një kritik i hapur i lidhjeve mes krimit të organizuar dhe politikës, ai ishte një nga tetë kandidatët në zgjedhjet e përcaktuara për 20 gusht, përcjell albinfo.ch.

Pjesa më e madhe e 19,000 kilogramëve të kokainës së regjistruar që u kapën në Britani vitin e kaluar ka të ngjarë të jenë marrë nga fraksionet shqiptare që punojnë me “Los Lobos” dhe bandat e tjera ekuadoriane për të transportuar drogë në brigjet britanike, shpesh përmes porteve në Belgjikë dhe Holandë, shkruan koha.net.

Agjencia Kombëtare kundër Krimit ka thënë se grupet e dhunshme kriminale shqiptare dominojnë botën e krimit britanik.

Mediat britanike disa herë kanë shkruar për grupet shqiptare në Britani dhe lidhjet me botën e krimit. Ato shpesh i kanë asocuar me tregtinë e seksit, trafikimin e drogës, trafikim me njerëz, e të tjera, përcjell albinfo.ch.