Me 40 kilogram drogë në supe, mësyn kufirin ilegalisht

I dyshuari e kishte hedhur në tokë ngarkesën dhe ka filluar të ikë në drejtim të pjesës malore, mirëpo policia iu kishte lëshuar pas, dhe kishte arritur ta arrestojë

Policia e Kosovës konfiskoi sot një sasi të konsiderueshme të drogës, rreth 40 kilogramë në pikëkalimin kufitarë të Vermicës që ndanë Kosovën me Shqipërinë. Drogën po e barte një shtetas i Shqipërisë, i cili me 40 kilogramë në supe po tentonte të kaloj ilegalisht në Kosovë.

Sipas një njoftimi lëshuar nga Policia e Kosovës, personi është arrestuar nën dyshimin e bazuar për “blerje, posedim, shpërndarje dhe shitje e paautorizuar e narkotikeve, substancave psikotrope dhe analoge”. Droga, sipas Policisë është e llojit marshuan (kanabis-sativa) që prodhohet në shtetin shqiptar.

“Njësia patrulluese kufitare e Policisë së Kosovës derisa ishte me detyrë zyrtarë në pikë vëzhgimi, afër bregut  të liqenit ka vërejtur një person duke lëvizur në këmbë nga Republika e Shqipërisë në drejtim të Republikës së Kosovës, duke shfrytëzuar rrugën afër bregut të liqenit. Personi i dyshuar (1977) është vërejtur se posedonte (të ngarkuara) me vete disa qese të dyshuara prej najloni dhe me të vërejtur këtë njësia Policore ka ndërmarrë veprime për arrestimin e tij”, thuhet në njoftim.

I dyshuari, sipas Policisë, ngarkesën e tij të cilën e posedonte me vete e ka hedhur në tokë, dhe ka filluar të ikë në drejtim të pjesës malore, mirëpo policia iu kishte lëshuar pas dhe kishte arritur ta arrestojë.

Gjate kontrollit dhe verifikimit të thasëve janë vërejtur gjashtëdhjetë (60) paketime të mbështjella të dyshuara me lëndë narkotike e llojit marihuanë. Pesha totale e substancës së dyshuar arrin rreth 40 kilogramë. Me vendim të prokurorit kompetent personi i dyshuar, sipas Policisë, dërgohet në mbajtje për 48 orë.