Më 12 maj mbrëmje bamirëse, “Shpëto Jetë”

Mbrëmja do të shoqërohet me tingujt e muzikës së artistes së mirënjohur Elina Duni

Fondacioni “Aksioni për nëna dhe fëmijë” më 12 maj do të organizojë mbrëmjen bamirëse “Shpëto Jetë” në Hotelin Marriott Cyrih, Zvicër, prej orës 19:00-22:00.

Mbrëmja bamirëse ‘Shpëto Jetë’ ka për qëllim e shpëtimit të jetëve të fëmijëve dhe uljes së shkallës së vdekshmërisë të foshnjave në Kosovë.

Që nga paslufta, kur shkalla e vdekshmërisë ka qenë 29 foshnja në 1,000 lindje, tash kemi arritur ta ulim në 11 vdekje në 1,000 lindje, shifër që ende mbetet më e larta jo vetëm në rajon, por edhe në Evropë.

Mbrëmja do të shoqërohet me tingujt e muzikës së artistes së mirënjohur Elina Duni, ku do të shërbehen pije dhe aperitif, me të cilin rast do të mbahet edhe një ankand i qetë. Ngjarja është e hapur për publikun përmes blerjes së biletës në vlerë prej 100 CHF për person. Persona të biznesit dhe filantropë ftohen të mbështesin mbrëmjen në cilësinë e sponsorëve, përcjell albinfo.ch.

Ngjarja bëhet e mundur falë mbështetjes së platformës AlbInfo.ch, kompanisë Eurokoha si dhe platformës Jamatu.

Aksioni për nëna dhe fëmijë është fondacion humanitar që i përkushtohet shpëtimit të jetës së fëmijëve dhe nënave në Kosovë. Ky fondacion zhvillon programe shëndetësore në klinikat gjinekologjike/obstetrike (që përkujdesen për nënat), Njësitë e Kujdesit Intensiv Neonatal (që përkujdesen për foshnjat e lindura para kohe) dhe klinikat pediatrike (që përkujdesen për fëmijë të sëmurë nga leukemia, sëmundje të zemrës, astma dhe sëmundje të tjera) në Republikën e Kosovës.