Mbyllja e kufijve do t‘i kushtojë Gjermanisë 10 miliardë euro

Mbyllja e kufirit për shkak të krizës së refugjatëve mund t‘i kushtojë vetëm Gjermanisë 10 miliardë euro, ka paralajmëruar Dhoma e Tregtisë në Gjermani, cituar nga “Focus”, përcjell albinfo.ch.
Kontrollet nuk do të ndalin lëvizjet përtej kufijve, por do ta rëndojnë shumë, duke çuar në rritjen e kostove dhe udhëtimeve të panevojshme të shtrenjta të furnizimit të mallrave, thuhet në Dhomën e Tregtisë dhe Industrisë.

Kohët e fundit industria e logjistikës në vend paralajmëroi se kontrollet kufitare tashmë i kanë shkaktuar ekonomisë gjermane 40.000 euro humbje në ditë. Shumë shoferë duhet të përpiqen të planifikojnë udhëtimet e tyre në mëngjes herët ose në mbrëmje vonë, për të shmangur bllokimet e trafikut, kjo nuk mund të jetë një zgjidhje e përhershme, thonë ekspertët.

Kontrollet kufitare ndikojnë jo vetëm në ekonomi, por edhe te qytetarët e zakonshëm, ndërsa në Bashkimin Evropian krijohet pasiguri për gati 1,1 milion njerëz që çdo ditë kalojnë kufirin në rrugën e tyre për të punuar, shton “Focus”, transmeton albinfo.ch.