Mbrojtja e përkohshme për ukrainasit në BE zgjatet deri në 2027

(KEYSTONE/Jean-Christophe Bott)

Komisioni Evropian ka propozuar që statusi i mbrojtjes së përkohshme për ukrainasit në Bashkimin Evropian të zgjatet për një vit tjetër, duke e shtyrë deri në mars 2027. Kjo vendim vjen si pasojë e situatës së paqëndrueshme dhe konfliktit të vazhdueshëm në Ukrainë.

Shtetet anëtare të BE-së do të diskutojnë dhe mund ta miratojnë këtë propozim në takimin e tyre javën e ardhshme.

Aktualisht, refugjatët ukrainas përfitojnë mbrojtje sipas Direktivitë së BE-së për Mbrojtje të Përkohshme, që i përjashton ata nga procedurat e zakonshme të azilit dhe u mundëson akses në tregun e punës dhe në përfitime sociale.

Sipas të dhënave të Komisionit Evropian, më shumë se 4.3 milionë njerëz kanë braktisur Ukrainën që nga fillimi i luftës, ndërsa Gjermania është pritëse e numrit më të madh të refugjatëve, mbi 1.2 milionë, përcjell albinfo.ch.

Komisioni thekson se vendet anëtare duhet të jenë të përgatitura për momentin kur refugjatët ukrainas do të mund të kthehen në vendin e tyre. Për këtë, qeveritë duhet të krijojnë mundësi të tjera për shtetasit ukrainas, si vizat për punë ose studime.

“Refugjatët duhet të informohen më mirë për opsionet e kthimit dhe të kenë mundësi të vizitojnë vendin e tyre me lehtësi,” u shpreh Komisioni.

Presidentja e Komisionit Evropian, Ursula von der Leyen, deklaroi se BE-ja do të vazhdojë ta mbështesë Ukrainën “për aq kohë sa të nevojitet”.

“Sot po propozojmë zgjatjen e mbrojtjes për ukrainasit që ikin nga lufta,” tha ajo në rrjetin social X. “Gjithashtu, po i ndihmojmë në zgjedhjet e tyre dhe po hapim rrugën për kthimin e tyre të sigurt në shtëpi.”

Magnus Brenner, komisioner për punët e brendshme dhe migracionin, njoftoi krijimin e një të dërguari special të BE-së për ukrainasit. Ai shtoi se statusi i mbrojtjes së përkohshme mund të përfundojë më herët se marsi 2027 nëse arrihet një armëpushim i qëndrueshëm.

Nga ana e tij, zëvendëskryeministri ukrainas Oleksiy Chernyshov i bëri thirrje ukrainasve të kthehen në atdhe sapo kushtet e sigurisë ta lejojnë, duke theksuar se ata janë të nevojshëm për rindërtimin e ekonomisë së vendit.