Mbi 100 udhëtarë u detyruan të kalonin natën në tren

Pasagjerët janë  ngujuar në trenin që nuk mund të lëvizte, pasi ishte bllokuar nga një ndeshje në mes të dy trenave tjerë

Natën e parmbrëmshme, udhëtarët e trenit të gjumit nga Cyrihu për në Budapest ishin përgatitur që të flinin gjatë rrugës, pasi që treni është për këtë destinim. Por ata nuk kanë pritur që gjumin ta bënin në Stacionin Kryesor Hekurudhor të Cyrihut, shkruan 20minuten.ch.

Pasagjerët janë  ngujuar në trenin që nuk mund të lëvizte, pasi ishte bllokuar nga një ndeshje në mes të dy trenave tjerë.

Mbi 100 veta u detyruan të bënin gjumin në trenin që e menaxhon kompania austriake ÖBB, transmeton albinfo.ch. Kjo ndodhi pas kaosit që shkaktoi ndeshja e dy trenave lokalë (S Bahn) pa udhëtarë në impiantin e shërbimit të SBB-së në Herdern, Altstetten të Cyrihut.

SBB në faqen e saj njofton se aksidenti ka ndodhur mbrëmjen e të enjtes rreth orës 21. Si pasojë e ndeshjes kanë dalë nga shinat tre vagona trenash. Njëri nga lokomotivistët e përfshirë ka pësuar një tronditje të lehtë. Ndihma e parë i ka transportuar të dy lokomotivistët në spital por ata janë liruar shpejt pasi që nuk kishin pësuar lëndime.

Por pasojat e aksidentit i kanë vuajtur pasagjerët e disa trenave lokalë që qarkullonin në këtë sektor si dhe treni i përmendur ndërkombëtar, i natës, përcjell albinfo.ch. Këta të fundit mundën të vazhdonin udhëtmin e tyre të nesërmen, në mëngjesin e hershëm.

Një dëm material në lartësi ende të panjohur kanë pësuar trenat e përplasur mes vete.

---