Mbi 10 mijë emigrantë hynë në Britani nga janari

Ilustrim

Shtatë varka me 374 persona arritën në brigjet britanike vetëm të shtunën, sipas raportit ditor të publikuar nga qeveria e Mbretërisë së Bashkuar, duke e çuar në 10,139 totalin e emigrantëve që kanë mbërritur nga kjo rrugë e rrezikshme që nga fillimi i vitit, përcjell albinfo.ch.

Kjo shifër mbetet më e ulët se ajo e vërejtur në të njëjtën kohë të vitit të kaluar. Por kalimet janë rritur ndjeshëm ditët e fundit falë motit më të mirë, me më shumë se 2500 njerëz që kanë mbërritur në brigjet britanike midis 10 dhe 17 qershorit, shkruan RTS.

Gjatë gjithë vitit 2022 janë regjistruar më shumë se 45,000 kalime, duke shënuar kështu rekord.

Vitin e kaluar, qeveria miratoi një ligj, deri më tani të bllokuar nga gjykatat, për të dërguar azilkërkuesit në Ruandë. Dhe, një projektligj i ri, i kritikuar edhe në OKB, planifikon të parandalojë emigrantët që vijnë nga Kanali që të kërkojnë azil.

Londra ka nënshkruar edhe disa marrëveshje me vende të tjera, si Franca apo Shqipëria, për të luftuar më mirë këtë emigracion të paligjshëm, përcjell albinfo.ch.