Mayweather tregon respektin për McGregorin

40-vjeçari amerikan mposhti McGregorin në raundin e dhjetë në superndeshjen në Las Vegas, duke përfunduar karrierën me 50 fitore dhe pa asnjë humbje

Floyd Mayweather thotë se kishte zgjedhur partnerin e duhur për ndeshjen e fundit të boksit, pas fitores ndaj kampionit të peshave të lehta të UFC-së, Conor McGregor.

40-vjeçari amerikan mposhti McGregorin në raundin e dhjetë në superndeshjen në Las Vegas, duke përfunduar karrierën me 50 fitore dhe pa asnjë humbje.

Pasi mbaroi gjithçka, Mayweather deklaroi se “iu dhamë fansave atë që deshën”.

“Ai është garues i fortë. Ishte shumë më i mirë se që e mendova. Por unë isha më i mirë”, ka thënë ai pas meçit. “Kjo ishte ndeshja e fundit, sigurisht. E zgjodha partnerin e duhur. Conor McGregor, ti je një kampion”.

29-vjeçari McGregor në T-Mobile Arena debutoi si boksier. Ai thotë se gjyqtari ndërpreu ndeshjen “pak herët”.

“Mendoj se isha afër. Bëhem pak i lëkundur kur lodhem. Gjyqtari ka mundur ta zgjaste edhe pak, të linte të më rrëzonte”, është shprehur irlandezi.