Macron flet për herë të parë pasi dosja Epstein tronditi Francën

Keystone (Mohammed Badra, Pool via AP)

Më shumë se një javë pas publikimit të miliona dokumenteve nga autoritetet amerikane lidhur me çështjen Jeffrey Epstein, presidenti francez Emmanuel Macron ka shprehur për herë të parë opinionin e tij publik mbi këtë dosje që ka shkaktuar bujë ndërkombëtare.

Nga Parisi, Macron u shpreh se çështja duhet të trajtohet nga drejtësia amerikane dhe shmangu komentet direkte mbi përmbajtjen e dokumenteve ose mbi personat e përmendur. “Drejtësia amerikane duhet të bëjë punën e saj”, tha ai për mediat.

Presidenti shtoi se mendimet e tij janë me viktimat, por nënvizoi se nuk është detyrë e tij të komentojë një hetim që është ende në zhvillim. Ai gjithashtu komentoi dorëheqjen e Jacques Lang, ish-president i Institutit të Botës Arabe, duke theksuar se vendimi ka qenë i tij personal.

“Ky është një rast për të cilin nuk mund të jap një koment. Jacques Lang ka vendosur vetë të largohet”, deklaroi Macron, duke konfirmuar se dorëheqja u bë publike gjatë fundjavës.

Reagimi i Macron vjen pas publikimit të miliona dokumenteve nga Departamenti Amerikan i Drejtësisë, të cilat përmendin figura të njohura nga politika, arti dhe kultura, përfshirë edhe Francën. Sipas dokumenteve, emri i Jacques Lang përmendet rreth 600 herë, ndërsa disa herë përmendet edhe vajza e tij. Megjithatë, përmendja e emrave nuk nënkupton akuzë penale, dhe autoritetet nuk kanë konfirmuar përfshirje të drejtpërdrejtë në veprime të paligjshme.

Përveç Lang, dokumentet përmendin edhe Olivier Colom, ish-këshilltar i ish-presidentit Nicolas Sarkozy, dirigjentin Frederic Chaslin, si dhe regjisorin fitues të Oscar-it, Michel Hazanavicius.

Publikimi i dosjes ka rihapur debatet mbi përgjegjësinë institucionale, transparencën dhe mënyrën e trajtimit të rasteve të ndjeshme që lidhen me figura publike, ndërsa autoritetet amerikane pritet të vazhdojnë hetimet për të sqaruar rolin e secilit person të përmendur në dokumente.