Macron: Evropa të forcojë planet kundër emigracionit të paligjshëm

Keystone

Presidenti francez, Emmanuel Macron, është i mendimit se Evropa duhet të forcojë planet kundër emigracionit të paligjshëm për t’u paraprirë flukseve që mund të vijnë nga Afganistani.

Në një deklaratë për shtyp të hënën, Macron paralajmëroi se “destabilizimi i Afganistanit mund të sjellë si rrezik flukse të shtuara migrimi të paligjshëm drejt Evropës”.

“Duhet të paraprijmë dhe mbrojmë veten ndaj flukseve të mëdha të migrimit të paligjshëm”, tha Macron.  “Vetëm Evropa nuk mund t’i përballojë pasojat e kësaj situate”.

Deklarata e Presidentit francez u bë teksa pamjet e mijëra afganëve që përpiqeshin të largoheshin nga Kabuli u qarkulluan vrullshëm në rrjetet sociale.

Të hënën avionë të SHBA-së, Britanisë së Madhe, Gjermanisë, Italisë dhe Francës morën nga Afganistani zyrtarë dhe familjarë të tyre për t’u siguruar jetën pasi talebanët morën kontrollin e Kabulit.

Macron tha mbrëmjen e së hënës se Parisi, Berlini dhe vendet e tjera të BE-së duhet të shtynë pa vonesa për të ndërmarrë një nismë të koordinuar që “do të përfshijë solidaritetin, luftën kundër flukseve të paligjshme migratore dhe ngritjen e një rrjeti bashkëpunimi me vendet tranzitore, si Pakistani, Turqia dhe Irani”.

Udhëheqësi francez këmbënguli se Franca nuk do t’i braktisë bashkëpunëtorët afganë që “punuan për më të mirën e vendit të tyre”, përkthyesit, gazetarët, aktivistët, apo dhe artistët.

“Afganistani nuk duhet të kthehet në strehë të terrorizmit sikurse ishte dikur”, vijoi Macron.