Lunacek: Nuk ka datë për liberalizimin e vizave

Dialogu për vizat fillon në dhjetor, por askush nuk mund ta dijë se sa kohë nevojitet deri në liberalizimin e vizave për kosovarët

Procesi për lirimin e kosovarëve nga detyrimi i vizave, parashihet të marrë më shumë kohë, përkundër premtimeve të qeveritarëve të Kosovës të lidhura me data dhe afate, njofton Radio Evropa e Lirë.

Gjatë qëndrimit të saj në Prishtinë, raportuesja për Kosovën në Parlamentin Evropian, Ulrike Lunacek, deklaroi se dialogu për vizat fillon në dhjetor, por askush nuk mund ta dijë se sa kohë nevojitet deri në liberalizimin e vizave për kosovarët.

Nga fillimi i javës tjetër, Kosova pritet të përmbushë një nga kriteret për liberalizimin, pasi që Ministria e Punëve të Brendshme ka konfirmuar se nga e hëna do të fillojë me lëshimin e pasaportave biometrike. Ndërsa, një nga sfidat e përmbushjes së kritereve është edhe zbatimi i marrëveshjeve që Kosova ka me vendet evropiane për ripranim dhe riatdhesim.

Ilhami Gashi, sekretar në Ministrinë e Brendshme, tha për Radio Evropa e Lirë se Ligji për ripranim po zbatohet nga ana e institucioneve të Kosovës. Megjithatë, nënvizoi ai, ka edhe sfida të shumta, pasi ligji fillimisht kërkon përfshirjen e shumë institucioneve dhe të niveleve të pushtetit. Kurse, shqetësimi është edhe më i madh në rastet kur të kthyerit nuk kanë as strehë mbi kokë.

Në dhjetor, kur edhe mund të nisë dialogu me Brukselin, pritet që Kosova të marrë edhe udhërrëfyesin e BE-së dhe më pas, mbase, do t’i bëhet një vlerësim më i saktë i përparimeve dhe sfidave që ka përpara deri në liberalizimin e vizave.