Lufta në Lindjen e Mesme ndryshon destinacionet e pushimeve për turistët zviceranë

(KEYSTONE/Gaetan Bally)

Me fillimin e pushimeve të Pashkëve, tensionet ndërkombëtare po ndikojnë ndjeshëm në planet e udhëtimit të qytetarëve zviceranë. Konflikti në Lindjen e Mesme ka bërë që shumë turistë të shmangin këtë rajon, duke zgjedhur destinacione që perceptohen si më të sigurta.

Sipas Stéphane Jayet, nënkryetar i Federatës Zvicerane të Udhëtimeve, rezervimet për destinacionet në Lindjen e Mesme kanë rënë me 15 deri në 20% krahasuar me të njëjtën periudhë të vitit të kaluar. Ai thekson se shumë qytetarë kanë ndryshuar planet e tyre për shkak të situatës së pasigurt në rajon, transmeton albinfo.ch.

Në vend të kësaj, qytete evropiane si Barcelona, Lisbona dhe Porto po përjetojnë kërkesë të lartë, kryesisht falë fluturimeve direkte dhe sigurisë më të madhe. Gjithashtu, udhëtimet me tren po bëhen gjithnjë e më të preferuara, si rezultat i përmirësimeve në rrjet dhe ofertave më të favorshme.

Evropa dhe Karaibet përfitojnë më shumë

“Turistët po orientohen më shumë drejt Evropës Perëndimore, si Spanja dhe Portugalia, ose po zgjedhin destinacione më të largëta si Karaibet, për shembull Santo Domingo,” deklaroi Jayet.

Ndërkohë, edhe udhëtarët që kishin planifikuar të udhëtonin drejt Azisë përmes aeroporteve tranzit në Lindjen e Mesme janë detyruar të rishikojnë itineraret e tyre.

Rritet turizmi i brendshëm në Zvicër

Zvicra vetë po përfiton nga kjo situatë. Rajoni i Ticinos mbetet ndër destinacionet më të preferuara brenda vendit. Sipas organizatës TicinoTurismo, më shumë se gjysma e dhomave të hoteleve në zonën e Locarnos ishin të rezervuara që në fillim të javës, ndërsa në Lugano shkalla e zënies ka arritur në 60%.

Edhe zonat malore, veçanërisht në Valais dhe Grisons, po tërheqin turistë që kërkojnë natyrë dhe ajër të pastër.