Londra përgatit dokumentet e fundit për të dalë nga BE

Dokumentet dëshmojnë se Britania e Madhe po përpiqet që negociatat për dalje nga BE-ja t’i ndërlidhë me një marrëveshje tjetër për rregullimin e raporteve me BE

Britania e Madhe ka përgatitur shumë dokumente për vazhdimin e procesit të daljes nga Bashkimi Evropian. Por, Londra kërkon që dalja të ndërlidhet me marrëveshje për partneritet.

Qeveria britanike kërkon me ngulm që njëkohësisht me negociatat për daljen nga Bashkimi Evropian të bisedohet dhe nënshkruhet një marrëveshje tjetër me BE-në për partneritet. Brukseli duhet të tregojë më shumë “fleksibilitet”, thuhet në një kumtesë të Ministrisë për Brex-it, raporton “DW”.

Delegacioni britanik nën drejtimin e ministrit për Brex-it, David Davis do të shkojnë Bruksel për të vazhduar negociatat për dalje nga BE. Javën e kaluara Londra ka paraqitur një radhë të tërë dokumentesh për pozicionet e saj, përcjell albinfo.ch.

Dokumentet dëshmojnë se Britania e Madhe po përpiqet që negociatat për dalje nga BE-ja t’i ndërlidhë me një marrëveshje tjetër për rregullimin e raporteve me BE, thuhet në kumtesë.

Këtu bëjnë pjesë bisedimet për obligimet financiare të Britanisë së Madhe ndaj BE-së, e ardhmja e kufirit të Irlandës me Irlandën e Veriut, si dhe të drejtat e rreth 3,2 milionë shtetasve të vendeve të BE-së që jetojnë në Britani të Madhe si dhe 1,2 milionë britanikëve që jetojnë në BE.