Lista Serbe kërkon zgjedhje në Veri

Keystone EPA/GEORGI LICOVSKI

Kryetari i Listës Serbe, Goran Rakiq, ka kërkuar shpalljen e zgjedhjeve në katër komunat veriore me dorëheqjen e kryetarëve, duke thënë se ata janë gati të marrin pjesë në to.

“Është e nevojshme që këta kryetarë komunash dhe këta këshilltarë komunalë të rremë, joligjorë dhe jolegjitimë, që kanë muaj që ngacmojnë qytetarët tanë, të japin urgjentisht dorëheqjen dhe të largohen, për të dalë nga godinat tona, sepse nuk janë përfaqësues të popullit tonë. Qëllimi i tyre i vetëm është të ngacmojnë shtetasit tanë”, është shprehur Rakiq, përcjell albinfo.ch.

Ai shton se këto vendime janë marrë në koordinim me Beogradin.

“Kjo është arsyeja pse këtë herë ne do të dëgjojmë këshillën e presidentit Vuçiq dhe sot po dërgojmë një mesazh se jemi gati të marrim pjesë në zgjedhjet në veri të Kosovës, dhe kështu të inkurajojmë procesin politik dhe dialogun që do të çonte në përmbushjen e kushteve tona që i kemi theksuar vazhdimisht deri më tani. Kjo është arsyeja pse ne i kërkojmë Prishtinës të shpallë zgjedhje të parakohshme lokale për kryetarë dhe këshilltarë në të katër komunat në veri të Kosovës sa më shpejt të jetë e mundur”, është shprehur Rakiq, shkruan koha.net.

Institucionet e Kosovës janë deklaruar kundër kërkesave për dorëheqje të kryetarëve në katër komunat në veri të Kosovës dhe kanë thënë se zgjedhjet në këto komuna do të mund të mbahen vetëm pas organizmit të një peticioni, me të cilin ata do të mund të largoheshin nga detyra.