Kosova

Limaj shpallet i pafajshëm

E premte, 9 Mars 2018 - 10:10 albinfo.ch

Një vit e pesë muaj pas ngritjes së aktakuzës ndaj Fatmir Limajt për krime lufte, gjykata shpalli aktgjykimin.

Gjykata Themelore në Gjakovë e ka shpallur të pafajshëm Fatmir Limajn në lidhje me vrasjet e dy civilëve, Ramiz Hoxhës e Selman Binishit, përcjell albinfo.ch.

“Nuk provohen elementet e veprës penale dhe i pandehuri lirohet nga aktakuza”, deklaroi gjykatësi në seancën e sotme.

Hoxha e Binishi ishin vrarë më 2 tetor 1998 në Komunën e Malishevës gjatë kohës së luftës, pasi sipas prokurorisë, ishin marrë nga persona të maskuar e të armatosur me uniforma të UÇK-së.

Megjithatë, kjo nuk është dëshmuar dhe Fatmir Limaj, i cili ishte i akuzuar, është shpallur i pafajshëm.