Lihtenshtajni financon projekte humanitare në Kosovë

Dotë investohet në një regjion të izoluar malor, në komunat Prizren, Dragash dhe Shtërpce

Principata e Lihtenshtajnit ka mbështetur materialisht tri projekte të Caritas-it të Zvicrës në Kosovë. Qeveria në Vaduz, kryeqytet i principatës, të martën ka lejuar 310 mijë franga për këto projekte.

Kjo shumë të hollash është planifikuar të investohet në një regjion të izoluar malor, në komunat Prizren, Dragash dhe Shtërpce. Në këtë regjion do të mbështeten projekte që do ta përmirësojnë bashkëpunimin në mes të shqiptarëve dhe serbëve si dhe do t`i përforcojnë bashkësitë e atjeshme fshatare, shkruan gazeta Liechtensteiner Vaterland.

Do të mbështeten financiarisht po ashtu edhe përpjekjet për shtimin e të ardhurave në regjion. Bëhet fjalë kryesisht për ngritjen e cilësisë dhe sasisë së prodhimit bujqësor. Ndërsa në fokus të projekteve në fjalë do të jetë edhe arsimimi.