Lideri i Koresë Veriore lë armët për kozmetikë

Lideri koreano-verior, Kim Jong-un, ka lënë pak anash konfrontimin me SHBA-në për të vizituar një fabrikë për kozmetikë në Pyongyang.

Ai vizitoi fabrikën e saporenovuar me anëtarët e partisë së tij dhe gruan, që shihet rrallë, Ri Sol-ju.

Kjo kompani ishte vizituar edhe nga babai i liderit aktual, Kim Jong-il, 14 vjet më parë, shkruan BBC.

Vizita në këtë fabrikë përbën lajm të veçantë, pas shumë fotografive që kanë qarkulluar së fundmi në të cilat shihet lideri koreano-veriore me armë dhe raketa përreth. Ai lavdëroi kompaninë dhe e ftoi të prodhonte kozmetikë të nivelit botëror.

Vizita u transmetua në mediat shtetërore, një ditë pasi Sekretari për Mbrojtje i SHBA-së, Jim Mattis deklaroi se shteti i tij nuk do të lejojë kurrë armatosjen me armë nukleare të Koresë Veriore, transmeton Albinfo.ch.

Mattis kishte thënë se përdorimi i armëve të tilla do të merrte si përgjigje një reagim masiv ushtarak. Tensionet janë rritur kohëve të fundit mes këtyre shteteve, pas testimeve që koreanoveriorët i bënë disa raketave të tyre.