Lëndohet Kukeli, rrezikon ndeshjen ndaj Serbisë

Ky dëmtim ka alarmuar gjithë stafin dhe tifozët kuq e zi, ngase Kukeli mbetet një nga lojtarët e pazëvendësueshëm të mesfushës për kombëtaren shqiptare

Shqipëria dhe trajneri Giani De Biazi janë në ankth. Kur kanë mbetur edhe dy javë deri në ndeshjen me Serbinë, mesfushori kryesor i kombëtares shqiptare, Burim Kukeli ka pësuar një dëmtim muskulor.

Mesfushori 31 vjeçar u detyrua të lëshojë fushën në minutën e 34 të takimit, në ndeshjen e Superligës zvicerane të zhvilluar gjatë ditës së martë, ku skuadra e tij “FC Zurich” barazoi pa gola ndaj Luganos, transmeton “albinfo.ch”.

Kukeli u është nënshtruar menjëherë kontrolleve mjekësore për të vlerësuar llojin e dëmtimit, por stafi mjekësor i klubit zviceran ende nuk ka dhënë detaje se sa kohë i nevojitet futbollistit shqiptar, për t`u rikthyer në fushë.

Ky dëmtim ka alarmuar gjithë stafin dhe tifozët kuq e zi, ngase Kukeli mbetet një nga lojtarët e pazëvendësueshëm të mesfushës për kombëtaren shqiptare.

Burim Kukeli ka të zhvilluara 12 ndeshje me Shqipërinë, ndërkohë ndeshja ndaj Serbisë llogaritet më e rëndësishmja për secilin futbollist Kuq e Zi.

Shqipëria, deri tash, ka siguruar një vend në fazën play – off, por në rast fitoreje me Serbinë mundësia është shumë e madhe që të kualifikohet direkt për në kampionatin Evropian.