Leitl: Investitorët duan siguri për investimin në Shqipëri

Presidenti i Dhomave Evropiane të Tregtisë dhe Industrisë, Christoph Leitl, ka kërkuar që marrëdhëniet e mira tregtare brenda rajonit të Ballkanit të konsolidohen në mënyrë që të krijohet besim për investitorët e huaj.

Ai ka thënë se mungesa e zbatimit të ligjit dhe korrupsioni janë pengesat kryesore  për investime të huaja në Shqipëri.

“BE pret fakte, jo premtime nga vendet e Ballkanit, sidomos në dy drejtime: zbatimin e ligjit dhe luftën kundër korrupsionit”, ka thënë ai.

Leitl  në një intervistë për DW ka thënë se marrëdhëniet tregtare mes 6 vendeve të Ballkanit Perëndimor nuk janë zhvilluar në dekadën e fundit, përcjell albinfo.ch.

“Si mund të futeni në tregun evropian, kur nuk jeni të aftë të keni marrëdhënie të mira tregtare në rajonin tuaj? Duhet forcuar bashkëpunimi mes vendeve të BP-së. Një nga fjalët e mia kyҫe gjithmonë është “Së bashku”, ka thënë ai.