Leci me Audi S2 fiton në “Drag Race 2017”

Leci, i cili jeton në Zvicër, është shprehur i kënaqur për fitoren, por jo edhe me kohën që e pati

Xhevdet Leci ka fituar garën e famshme që po mbahet çdo vit në Kosovë “Drag Race 2017”.

Shtegun prej 402 metrave, Leci e kaloi për 10.001 sekonda me Audin S2 të tij.

Fitorja e tij erdhi pas një gabimi të kundërshtarit Skender Potera që u diskualifikua në finale pasi preku një nga matësit e fundit.

Leci, i cili jeton në Zvicër, është shprehur i kënaqur për fitoren, por jo edhe me kohën që e pati.

“Normalisht që jam i kënaqur me faktin që e fitova garën, por kam pritur të kem kohë më të mirë. Sivjet kam marrë pjesë në Osijek e Grobnik dhe në të dyja rastet jam renditur i pari. Vetura është në gjendje të shkëlqyeshme, por pista ka qenë e tillë që nuk ka lejuar kohë më të mirë”, është shprehur Leci pas fitores, duke shtuar se të shtunën do të marrë pjesë në Hockenheim të Gjermanisë, në një garë me konkurrencë jashtëzakonisht të fortë.

Një gabim në vozitjen finale i ka kushtuar Skender Poterës me humbjen e pozitës së parë në klasën e 9-të, por gjithsesi që ai ka qenë njëri nga garuesit më atraktivë, e njëkohësisht edhe fitues i çmimit për kohën më të shpejtë.

“Jemi përgatitur mirë për garën, sepse kemi pasur njohuri për pjesëmarrësit tjerë. Jam shumë i kënaqur me kohën, të cilën nuk e ka arritur askush më parë. Jam i bindur se edhe në vitin e ardhshëm do të jem më i shpejti. Një gabim në finale na kushtoi me diskualifikim, por ajo ndodhi nga fuqia e madhe e veturës”, ka thënë Potera, i cili i paraqit me Audi S2.

Të shtunën ai pati kohë fantastike prej 9.109 sekonda, me shpejtësi prej 262.77 km/h.

 

Fituesit në klasa:

Klasa 16: Leutrim Sylejmani (Golf VI) 15.548 sekonda

Klasa 15: Jaha Vllahiu (Audi A3 S3) 14.456

Klasa 14: Emin Dobra (Opel Kadet) 13.017

Klasa 13: Jahmin Krediç (BMW E30) 13.012

Klasa 12: Llukman Iballi (Audi S8) 12.461

Klasa 11: Ardi Potera (Audi RS6) 10.930

Klasa 10: Arton Ajvazi (Nissan GTR) 10.080

Klasa 9: Xhevdet Leci (Audi S2) 10.001

 

---