LDK: Presidenti Thaçi i paautorizuar për të udhëhequr dialogun me Serbinë

Udhëheqja e dialogut mes Kosovës dhe Serbisë nga ana e Presidentit, Hashim Thaçi është e paautorizuar sipas LDK-së.

Me anë të një njoftimi Lidhja Demokratike e Kosovës ka kritikuar udhëheqjen e dialogut nga ana e Presidentit Hashim Thaci.

“Presidenti i Kosovës, i paautorizuar për të udhëhequr dialogun me Serbinë, sot, ende pa nisur mirë ky dialog, hoqi të gjitha vijat e kuqe në tavolinën e dialogut me kontestuesit e shtetësisë sonë”, ka thënë LDk me anë të njoftimit, shkruan Albinfo.ch.

Sipas LDK-së, Kuvendi i Kosovës, deputetët duhet ti vendosin vijë të kuqe presidentit.

“Secili proces i pakushtëzuar ndaj rendit tonë kushtetues dhe secili krahasim me shtetësinë e Palestinës përbën naivitet politik të rrezikshëm dhe është skajshmërisht i dëmshëm për pozicionin ndërkombëtar të Republikës së Kosovës. Prandaj, është e domosdoshme që Kuvendi i Kosovës, përfaqësuesit e qytetarëve në Kuvend urgjentisht të vendosin vijë të kuqe për Presidentin që, i paautorizuar, ka marrë në dorë fatet e vendit”, ka njoftuar LDK.