LDK-ja e PDK-ja tregojnë ku kanë fituar

Shefi i shtabit zgjedhor të LDK-së, Lumir Abdixhiku ka deklaruar se partia e tij është konfirmuar si partia më e madhe në vend në balotazhin e mbajtur në 19 komuna.

Duke mos folur për një rezultat përfundimtar në Prishtinë, Abdixhiku ka shpallur fitoren në Gjilan, Podujevë, Istog dhe Vushtrri, përcjell albinfo.ch.

“Raundi i dytë i votimeve e konfirmon LDK-në si partinë më të madhe në vend. Katër komunave të fituara, iu shtohen edhe plot të tjera. Fitore bindëse ka shpallur në Gjilan, Podujevë, Istog dhe Vushtrri. Rezultate inkurajuese nga Dragashi, Kamenica, Ferizaj dhe Suhareka”, ka thënë ai.

Partia Demokratike e Kosovës vazhdon të thotë se është partia e parë në vend. Zyrtari i PDK-së, Abelard Tahiri tha se PDK-ja prinë në shumicën e komunave ku po garon.

“Pra, siç është pritur, PDK-ja është partia që ka fituar numrin më të madh të komunave në zgjedhjet e sotme. U shpërblye vendimi i subjektit tonë për të garuar më kandidatët më të mirë dhe unifikues, që përfaqësojnë dhe përqafojnë unitetin qytetar, në të gjitha komunat”, ka Tahiri në konferencën për media.